地方高峰會 4保安招呼1記者

【明報專訊】政府話要探討點樣加強區議會職能，噚日柴灣青年廣場搞首場地方行政高峰會，畀參加區議員發表意見。論壇中間有30分鐘小休時間，嘉賓獲邀去大堂享用茶點，記者就要去另一個由民政事務局專登安排「記者室」等，搞到記者想搵區議會主席傾偈都好困難。Emily見有悶想出去買杯咖啡飲，仲畀最少4個保安跟住一齊搭走。

區議員關心1億撥款分配

論壇原本係想講「提升區議會和民政事務專員的角色」，但唔少區議員都提出其他問題。東區區議員李進秋就質疑點解社區重點工程項目1億元撥款，要按18區分，話東區咁多人，平均分到撥款會少。民政局常任秘書長楊立門話1億撥款只係試驗性質，若下屆再有，都可以諗用乜基礎分配呢筆資源。

民主黨南區區議員區諾軒質疑，區議會財政自主不足，亦無人事任免權，令區會權力唔夠。民政局長曾德成話，政府請人有嚴格、公平同公開程序，若區議會多權，可多人才參與，都可以研究。

中西區區議員陳學鋒話，唔少區會撥款都係一年批一次，對區會講好難作長遠規劃，建議由每年批一次，改為每屆區議會撥款一次。曾德成話第一次聽到呢個意見，要聽各區議會係咪支持先！