新聞類別
港聞
詳情#
【明報專訊】新民主同盟范國威(Gary)前排同一班志同道合人士喺報紙刊登源頭減人廣告,觸發罵戰。
噚日Gary係立法會大會又提出動議議案,促請政府積極處理中港矛盾,仲要喺制訂政策時須以「港人優先」為依歸,各黨派議員喺會上當然熱烈討論啦,會計界梁繼昌就話,家香港嘅居住環境窄到連做愛嘅地方都無,所以政府不如做好人口政策,鼓勵生育「源頭加人」。不過,建制派議員批評Gary唔識飲水思源,民建聯鍾樹根仲話嗰個係一個法西斯議案。
樹根批評議案法西斯
噚日唔單止議會討論熱烈,Gary喺大圍嘅地區辦事處都非常熱鬧,Gary噚日47歲生日,唔知係咪因為咁有人去慶祝Gary生日呢?噚日約30名「家庭團聚互助會」新界分會成員就去咗Gary喺大圍嘅地區辦事處,佢哋話愛港愛國及家庭團聚重要,抗議Gary主張要收番單程證審批權。噚日已經係一星期內第二次有人去范國威辦事處「踩場」抗議,上星期六佢先招呼完約40名愛港力成員。
回應 (0)