張宇人請食龜苓膏

【明報專訊】飲食界立法會議員張宇人噚日喺立法會大會，買咗百幾盒海天堂龜苓膏請一眾議員同記者食，拍心口話肯定入面有龜，叫大家放心食咁話。


「差唔多一星期食一次」

Emily問張宇人，係咪好鍾意食龜苓膏，佢話差唔多一星期會食一次。睇見張宇人嘅皮膚又白又滑，佢話未必全部都係龜苓膏嘅功勞，因為極有可能係因為佢媽媽生得佢天生麗質喎！


早前有媒體報道，話龜苓膏發霉洗淨照賣，又話龜苓膏無龜板成分，海天堂就聲言遭陷害，仲報番公安。張宇人話，香港海關已經還咗一個清白畀海天堂，證明佢哋出產嘅龜苓膏係有龜成分㗎，加上佢自己覺得海天堂係被人屈好唔值，所以出錢以35元一盒嘅價錢，買咗百幾盒去立會。佢咁落力幫海天堂賣廣告，所以大家都好畀面，食咗好多。