岳少田少唐唐贈巨酒

【明報專訊】噚晚係香港美酒佳餚巡禮開幕嘅日子，人稱「岳少」嘅旅發局主席林建岳大搞噱頭，揼好友田少（田北俊）同唐唐（唐英年）心口，3個喜愛歎紅酒嘅大少爺各捐一款法國頂級酒莊紅酒，仲係6公升特大裝，畀參加美酒佳餚巡禮嘅市民品嘗。


唐唐贈酒身價最高

唐唐捐嘅係1989年嘅武當羅富齊，年份最舊，身價也最高；田少捐嘅係1998年拉圖，都係難得好酒；岳少捐嘅係2005年La Conseillante，名氣略遜於另外兩款。岳少中午宴請傳媒時講笑，話最擔心周末會打風，影響市民入場，特登吩咐旅發局同事劏豬還神。今年嘅巡禮告別西九，移師中環海濱，東邊入口貼近新政總，政府官員同立法會議員去幫襯都非常方便。