譚校長單日帳面賺百萬

【明報專訊】佳景（0703）前日公布，請咗叱吒樂壇逾30載嘅譚詠麟（譚校長），代言旗下品牌「澳門英記餅家」嘅手信產品。譚校長除咗有表演費收，仲有佳景嘅購股權，可以用每股3.07元（即係比前日收市價溢價2.68%），買最多500萬股。唔知股壇係咪有好多譚校長嘅fans，噚日佳景一口氣升咗一成，收報3.28元，創下歷史新高。粗略計下，校長一日之內帳面賺成105萬﹗不過份協議規定，購股權最快都要明年4月先可行使，而且仲要分批買，唔知到時個市仲旺唔旺校長呢？


睇番佳景呢間公司個track record，真可謂風雨飄搖。佢2002年8月上市後嗰一個多月內，曾經響3蚊以上短暫徘徊過，之後就長期在1蚊水平度唔上唔落。2003年底開始，公司更停咗3年牌，因為前主席同其他幾位高層涉嫌挪用公款，被後來嘅主席兼大股東陳澤武興訟追討。個股價都係上星期五先再次掂到3蚊。譚校長用「友情價」3.07元先買到一股，就算真係入貨，小琴都戥佢出一身汗。


不過陳澤武係澳門有名嘅政商界人士，四太梁安琪都同佢一齊夾份投資過佳景，公司仲有阿叻陳百祥做獨立非執董，對校長嚟講應該都有一定信心保證嘅﹗又或者，校長啲粉絲可以多啲過澳門幫襯英記，到時生意好，公司有錢賺，股價又可以升多啲。


email: piano@mingpao.com