關信基現身 捧湯家驊場

【明報專訊】公民黨湯家驊早前拋出政改方案，未獲得該黨支持，佢噚日搞咗個政改論壇，亦無公民黨其他立法會議員撐場，反而無黨派嘅黃毓民、工黨何秀蘭同民主黨單仲偕都畀面做台下觀眾。雖然個黨唔撐，但係久未現身公開場合嘅公民黨創黨主席關信基（圖），噚日就坐足全程，仲不時同講者交流。


精神奕奕 話黨容納唔同聲音

至於上年立法會選舉後，幾乎已絕迹公開場合嘅關信基，據聞早前患咗大病，但噚日佢就精神奕奕現身公民黨論壇，由頭坐到尾之餘，仲不時發言同講者交流。關教授話過去一段日子佢都忙於研究工作，但就未有設計普選方案。


身為創黨主席，佢點睇近日公民黨好似分裂咁，如湯家驊提政改方案要用個人身分；毛孟靜講本土政策，個黨又唔同立場呢？關信基就話，湯家驊一貫作風都係咁，從另一個角度睇，公民黨正正可以容納唔同聲音，即使唔係多數支持都可以發聲，佢仲以自己曾經做過中大政治及行政學系系主任做比喻，話作為系主任，佢都會搵唔同意見嘅老師入嚟，希望學生聽多啲唔同聲音。


咁公民黨以至泛民係咪鬧交？關教授就笑言，鬧交係社會常態，但家庭內部爭吵，唔等於去到分裂咁嚴重。