勞福局政助新人上任

【明報專訊】近期有唔少政府委任官員跳船，但係都有人夤夜趕科場，勞工及福利局長政治助理噚日搵到人，曾經喺智經研究中心做政策倡議總監嘅黎穎瑜會喺11月1日上任。佢上任前係齊心基金會副行政總裁，齊心基金會係核心梁粉張震遠同鄧爾邦成立，有傳呢個基金會幫手搞「港人講地」發表親梁振英政府嘅文章，家揸fit人係梁振英好友陳家駒。


黎穎瑜曾任智經總監

黎穎瑜喺牛津大學社會學碩士畢業，2003年到08年喺理大同港大專業進修學院做講師，又做過電台節目客席主持。2008年到2012年喺智經研究部工作，之後入咗齊心基金會。佢亦係文藝復興基金會副理事長、青年智庫Roundtable理事會成員同三十會嘅成員，前任政治助理莫宜端都係三十會成員，兩人背景有啲相似。


與莫宜端同為三十會成員

勞福局長政治助理呢份工真係每個月都有新發展，8月24日莫宜端離任，9月23日政府宣布莫宜端有新工，做兒童無限學校（九龍塘）助理總監（研究與發展）；到咗噚日10月25日，政府就宣布搵咗新嘅政治助理，都係一個月左右。