議員立會秘道快閃

【明報專訊】一班香港電視員工連日喺政府總部「狙擊」支持政府嘅建制派議員，而立法會外噚晚亦萬人空巷撐發牌，搞到議會內一眾建制派都幾緊張。有議員就話，原來立法會內有條後門秘道，預備畀議員避開正門嘅示威區「潛逃」，聞說有議員噚晚已經循秘道走咗。


立法會噚晚10時後休會，今早再續會。一班泛民議員噚日一早喺會議廳外，拎住市民支持發牌嘅聯署紙，一字排開「恭迎」建制派議員開會，但建制派扮無嘢掂行掂過。


入夜後，支持同反對動議嘅市民分別坐滿整個政總同立法會示威區。經過當年審議高鐵撥款一役，一眾建制派議員做好留宿準備，好似工聯會黃國健，一早放定衫褲喺立會。馬逢國辦公室除咗有衫褲，仲有電影DVD，有心理準備「被困」時煲碟。


獲贈誠實豆沙包 建制派耍手擰頭

有建制派議員就話，留宿唔係問題，最怕係成晚流流長無嘢食斷糧，所以一早去5樓咖啡閣問定有無足夠糧食儲備。一班港視員工就好似同建制派心有靈犀咁，噚日託資訊科技界議員莫乃光送一袋「誠實豆沙包」畀建制派，可惜一眾建制派見到即耍手擰頭，民建聯葉國謙見到豆沙包後，拋低一句「大家食多啲」就走人。


為咗確保特權法唔會通過，政府派出政務官做「狗仔隊」，睇實議員去向，但可能預期噚晚表決唔到，狗仔隊人數亦唔算多。