黃國健：心中無鬼

【明報專訊】立法會一連兩日討論係咪引用權力及特權法要求索取政府決策免費電視牌照嘅文件，前晚有大批人喺立法會外聚集，一見到建制派議員即高聲鬧爆。而一眾議員前晚散會後，有人坐立法會安排嘅小巴離開，有人揸車經「秘道」走，但亦有至少兩名議員就費事風頭火勢時走人，包括工聯會黃國健同民建聯何俊賢，選擇留宿立法會。


何俊賢過夜瞓得唔好

一早諗好喺立會過夜嘅黃國健，前晚喺辦公室瞓，但成層樓得佢一個人驚唔驚？佢話自己「心中無鬼」有乜好驚？又話舊年買咗張梳化牀都未用過，噚日終於第一次用，瞓得唔錯。不過，佢黨友王國興就話，自己前晚步行離開立法會，無擔心被示威者包圍，仲話自己識太極好打得云云，但細問之下就知道，其實佢並無經過示威區，而係沿海旁方向行去中環。


漁農界嘅何俊賢留宿係因為以為走唔到，佢又想跟其他議員搭小巴走，所以索性留喺立會，而且大樓有埋冲涼設備，好方便。不過佢就呻話瞓得唔好，除咗因為自己太高、梳化唔夠長，原來立會朝早7點就開始試鐘聲，搞到一早就被嘈醒。


阿謙學歷被惡搞火滾

建制派備受公眾壓力，雖然無議員被人圍，但噚日民建聯葉國謙就好嬲，皆因佢發現維基百科上佢嘅學歷被人改咗，由讀華南師範大學地理系改成粗口諧音「調理農務系」畢業，佢大罵擅改資料嘅人「無聊、卑鄙、乞人憎」。噚晚Emily再睇維基百科，阿謙嘅學歷已改番為讀地理系喇。