亞視唔怕最早玩完

【明報專訊】亞視噚日搞咗個「千人手語傷健傳愛大行動」提倡傷健共融，呢期免費電視牌照事件全城熱話，亞視助理副總裁冼偉智出席活動之後話，亞視一向反對增發免費電視牌照，但佢堅決否認係因為經營環境受到威脅，「去到最後一刻，如果（有電視台）要被淘汰嘅，亞視會係最後一間……亞視有信心會一路走下去」。對於政府係咪就發牌規則「搬龍門」，冼偉智話係政府決定而唔肯評論。


海天堂派龜苓膏受歡迎

另外，受龜苓膏風波影響嘅海天堂創辦人吳耀明噚日都有現身會場，會場仲大派海天堂龜苓膏及「買一送一」優惠券，市民個個爭住要，仲話有無龜都照殺，可以「當涼粉食」喎。睇嚟鬍鬚佬都幾識趁機會做吓宣傳。


5000人手語倡共融

「手語大行動」噚日晏晝舉行，食物及衛生局長高永文、副民政事務局長許曉暉、副商經局長梁敬國，聯同多間中小學、復康團體等機構合共5000幾人，一齊用手語表演陳百強《摘星》一曲，呼籲多啲人學手語，同時希望活動可打破健力士紀錄。