「愛字頭」遇周梁 又噓又拍掌

【明報專訊】「政壇無永遠嘅敵人」名句喺噚日嘅《城市論壇》上被完美體現。話說呢日講免費電視發牌，近排同泛民企埋同一陣線嘅自由黨，派出主席周梁淑怡出席，點知一開聲就畀「愛字頭」人馬狂噓，但一分鐘後周梁話佢都「支持行政主導」，「愛字頭」就即刻掌聲鼓勵，轉軚速度快過謝偉俊。


城市論壇一開始會請嘉賓作首輪發言，輪到周梁講嘢時，佢都未開聲，台下嘅愛港力同埋其他維園阿伯阿婆已經噓咗先，搞到周梁黑晒面，直至周梁話支持行政主導、唔同意立會「拖後腿」，愛國嘅朋友們又拍爛手掌。無奈嘅周梁此時又出手叫停掌聲，話「頭先啱聽，家個啲唔啱聽」，因為下一句佢又變身「反對派」，批評行會決定不智，無法以理服人。


至於愛字頭重點狙擊對象、公民黨主席余若薇，當然避唔過愛字頭嘅「厚愛」，除咗每次發言都被罵「亂港」，離開時座駕亦被包圍，唔講仲以為梁振英又落區