大浪西有望保青葱

【明報專訊】政府建議將大浪西灣納入郊野公園嘅計劃峰迴路轉，鄉議局主席劉皇發（發叔）今日會喺立法會提出廢除政府修訂令，將大浪西灣剔出。由20多個環團組成嘅保衛郊野公園行動，噚日發出公開信畀全體民建聯立法會議員，呼籲佢哋唔好與民為敵，阻止政府保育，又指民建聯作為香港最大政黨，應向市民負責，唔能夠只向地區經濟利益傾斜。


保衛郊野公園行動發言人話，政府將大浪西灣納入郊野公園，只是順應民意，現時已進入最後階段，立法會正在審議修訂令，但建制派就喺呢個時候提出廢令，上星期發叔提出動議，要求審議法例嘅委員會表態，反對將大浪西灣納入郊野公園，由於得到建制派議員支持，所以動議獲得通過。


最遲下月表決 人力表態支持

修訂最遲須於下月4日提交立法會大會表決，需要分組點票。據了解，政府上星期評估形勢，發現仍未有足夠票數反對修訂，但近日泛民各黨已表明支持政府，被視為游離票嘅人民力量都已表態支持（2票），所以政府嘅建議，有望得到落實。