泛民都用秘道走

【明報專訊】上星期三立法會討論係咪引用特權法索取有關免費電視牌照嘅文件，成班市民喺立法會外聚集，結果20多名議員要用立法會地庫「秘道」離開，Emily聽聞，其實當晚使用秘道嘅議員，除咗建制派外，其實亦有部分係民主派，雖然公民黨吳靄儀事後批評秘道係顛覆立法會憲制地位，但當晚使用秘道嘅，原來亦包括4名公民黨成員。


唔理秘書處呼籲 議員好老定

Emily聽聞，上星期當大批公眾包圍立法會後，秘書處至少兩次向議員發短訊，呼籲佢哋盡早將座駕揸走，不過無乜議員理會，停車場仍然泊住大批車，連秘書處都感到無奈，點解班議員咁老定，唔通一早諗定要用秘道走？

周三晚最終有成20多個議員用秘道開車走，Emily聽聞其實秘書處都有再三問議員，係咪真係要使用呢條路，但就有民主派質疑點解唔用得，最終用秘道離開嘅民主派，至少包括公民黨郭榮鏗、湯家驊、毛孟靜、郭家麒，以及民主黨單仲偕。


有建制派堅持唔走後門

雖然建制派當晚成為眾矢之的，但亦有部分人同秘書處講明，一定要行正常通道離開，當中包括經民聯梁君彥，表明拒絕走後門，結果經民聯多名議員一齊搭由秘書處安排嘅小巴由正門離開。


有政界中人同Emily講，如果要好似吳靄儀講咁，要維護立法會嘅憲制地位，其實好簡單，只要將條秘道好似特首梁振英處理大宅僭建咁，起幅牆嚟封住佢就可以，但相信無論民主派定建制派，都未必會贊成呢個做法。