誠哥千萬捐科大助創業

【明報專訊】Emily個facebook早幾日被Bitstrips啲漫畫公仔洗版，開發呢個App嘅新創公司一炮而紅，仲被投資者睇中揼本投資，但呢啲成功例子背後，就係一個個充滿創意同心血嘅故事。科技大學噚日宣布獲李嘉誠基金會捐出2000萬，用來資助學生做國際研究、創業等。誠哥話，相信科技係改變明天嘅關鍵，所以一直都好支持有潛力、敢變革嘅新創公司。


誠哥又會幫手安排學生去自己私人投資嘅全球新創公司實習，令學生可以體驗吓新創公司嘅文化同運作模式，同國際人才交流切磋，又可以親眼睇到新創公司背後默默耕耘、唔怕失敗嘅過程。誠哥仲話，只要學生明白成功非僥倖，先會有不斷創新同嘗試嘅勇氣，咁先可以為香港科研之路注入新動力。科大就話會向政府申請配對補助金，令到多啲學生受惠。