方剛張建宗無偈傾

【明報專訊】最低工資一役，令勞工及福利局長張建宗同商界一直有心結，嚟緊傾輸入外勞，自由黨立法會批發及零售界議員方剛透露，佢同張建宗同場食飯，已經係兩年前嘅事。當時零售業協會請咗張局長做飯局嘉賓，方剛就開宗明義同局長講，睇嚟「今次係我哋最後一次同枱食飯」。結果，局長又好，方剛又好，真係無再約對方，至今見面都只係打招呼，關係認真麻麻。


方：畀人「過咗一戙」

點解最低工資一役嘅影響會搞到家？如果大家記得，當年最低工資嘅條例原稿，原本列明「飯鐘錢」同「休息日」兩者都唔計薪，但局方向勞工界議員「摸底」後，突然剔除相關條文，改為勞資雙方自行協議。難怪方剛話覺得當年畀人「過咗一戙」，所以唔會主動約對方食飯咁講。


Emily估唔到嘅係，連張局長都咁唔識做，唔先釋出善意。不過，方剛話無有怕，因為輸入外勞決定都唔喺局長嗰度，睇怕政府日後要搞掂呢班商界朋友，要多啲搵人吹水食飯先得啦！