林鄭大仔：一定不從政

【明報專訊】政務司長林鄭月娥早前講過工作辛苦，家人又喺英國，佢自己獨居半山官邸，不過，近日林太開心好多，因為家人返嚟陪佢。林太噚日就同大仔林節思（Jeremy）出席同一個慈善活動，但Jeremy有啲怕醜，唔願意同媽咪合照。Jeremy今年6月由劍橋大學數學系畢業歸來，但佢話仲未決定搵乜嘢工，但講明一定唔會從政，亦唔會做有關數學本科嘅工作，但會考慮到內地或外國發展。


同媽咪傾偈不談時事

林太細仔仲喺英國讀緊書，林鄭過往極少攜家人出席活動，碰巧噚日同大仔一齊出席「無止行」步行籌款活動，Jeremy可能少見咁多傳媒，所以表現有啲怕醜，記者叫佢同媽咪合照，佢就婉拒咗。


Jeremy其後解釋，當時太多主禮嘉賓同媽咪合照緊，所以唔係好想走埋去。佢又話，搬番嚟香港住，成日見到媽咪、同媽咪傾偈，所以好開心，但講明二人唔會講時事議題。


22歲嘅Jeremy年紀輕輕，原來已經為「無止橋」活動做咗4年義工，先後3次去到甘肅、雲南及重慶山區，為當地搭建「無止橋」，改善村民生活。佢最初做義工係出於好奇，以前只去過大城市，想了解一下內地山區等另一面文化，印象最深刻唔係搭橋有幾辛苦，而係同一班小朋友玩嘅經歷。


去山區搭橋 感港人幸運

鍾意畫畫嘅Jeremy帶埋畫具去山區，為小朋友畫大象、長頸鹿等，後來有個細路女送鮮花畀佢，Jeremy深感物輕情意重，即場拋出古詩十九首其中兩句﹕「此物何足貴，但感別經時」。13歲就喺英國生活嘅佢，仍熟讀詩詞。


Jeremy憶述山區農民生活，話「廁所」只係喺地下挖個窿，冲涼就搵桶水淋吓身。體會過農村嘅貧窮，Jeremy話香港人好幸運，例如唔使擔憂食水問題，覺得香港人唔應該太抱怨，要知足。被問菲律賓風災港人應否捐款，Jeremy義正詞嚴咁答﹕「幫助任何有需要嘅人都應該義不容辭。」