問卷激親阿涂 團體收回

【明報專訊】民主黨立法會議員涂謹申（阿涂）噚日收到由明愛西貢長者中心寄出共7頁紙嘅「報告」，回顧佢對全民退休保障同長者政策方面嘅「政績」，仲有一份問卷，分別將馬尼拉人質事件受害人同雷曼事主形容為「個別不幸的有餘錢旅遊人士」、「有餘錢投資人士」，問阿涂到底呢班人定係弱勢嘅貧窮長者更需要幫助。阿涂收到份咁嘅問卷，都忍唔住上載facebook，有啲氣憤咁話「做人要有良知，請尊重死去的香港人」。


事緣有個叫「全港長者及護老者權益聯席」嘅組織，請咗阿涂出席兩次論壇，阿涂都唔得閒去，於是就出個「回顧報告」。有份寫嘅西貢長者地區網絡長者代表李文傑話，字眼係大家開完會決定嘅，唔係想對死者唔尊重。


稱事主「有餘錢旅行」

「聯席」代表黃姑娘（社工）就同Emily講，呢件事係誤會，應該係個別成員無同聯席詳細討論就出咗份報告，唔關明愛事，並決定收番呢份報告。而明愛嗰邊呢，至截稿前都無人回覆Emily。


社工收回 阿涂：請尊重死者

阿涂幫助菲律質人質同家屬，亦有為雷曼投資者出過頭，佢話成日都有唔同團體請佢出席活動，無可能個個去晒，黨內議員亦有分工，長者服務唔係佢主打工作。佢又話既然對方收番份報告，佢就唔再評論喇。