Sogo優惠日迫爆 警方區議員睇住

【明報專訊】近日係銅鑼灣崇光（Sogo）半年一度嘅感謝周年慶大優惠日，照例吸引成千上萬嘅人，場面有幾墟冚？有片你睇！有人將日前周年慶開門營業一刻片段上載（http://www.youtube.com/watch?v=guRwo-Jv2wI），只見當玻璃門打開，守候多時嘅人立即水銀瀉地咁湧入去。佢哋最後買唔買到心儀貨品就唔知喇，但Emily就睇到心驚驚，好彩無人跌倒發生意外，有網友就話﹕「唔講仲以為喪屍game宣傳片。」


區議員怕骨牌咁跌

灣仔區議員黃楚峰話，有注意到Sogo萬人空巷情况，擔心如果前排位置有人跌倒，可能致骨牌效應造成多人受傷。佢認為Sogo應該有社會責任，一早預計到會吸引咁多顧客嘅話，應該及早作相應措施，唔好搞到同時間聚集咁多人佔用公共地方（包括出面嘅東角道同軒尼詩道）。


Sogo話無亂：經驗豐富

崇光公關代表就回應，Sogo有多年舉辦同類大型活動豐富經驗，事前已安排足夠人手處理；初步了解，顧客喺進場時守秩序，亦無出現混亂。警方發言人就話，灣仔分區人員會留意區內人流安全情况，有需要時採取適當行動。