和平紀念碑伯大尼列法定古蹟

【明報專訊】政府噚日宣布，古物事務監督根據《古物及古蹟條例》，將中環和平紀念碑同埋薄扶林道139號伯大尼修院，一齊列為法定古蹟。


和平紀念碑喺1923年5月25日，由當時港督司徒拔爵士揭幕，係香港首座為紀念第一次世界大戰死難者而建嘅紀念碑，屬古典復興建築風格。


講起呢塊紀念碑，最初原來只係刻有「The Glorious Dead」字樣，以及第一次世界大戰嘅年份（即「1914-1918」）；後來先至再刻上「1939-1945」年份，悼念第二次世界大戰嘅死難者。1980年代，紀念碑側面再加上「英魂不朽 浩氣長存」8個中文字，與原刻喺碑上嘅「The Glorious Dead」3個英文字意義相同。


伯大尼修院喺1875年由法國外方傳道會興建，本身係療養院，1974年關閉，賣畀香港置地公司，其後由政府接管，1978至1997年間租畀港大。2002年，政府決定修復伯大尼修院，改建工程喺2006年完成，自此成為演藝學院電影電視學院嘅校舍。