黃鳳翎同學仔 返學扮北極人

【明報專訊】Emily未去過南、北極，但最近喺東華三院黃鳳翎中學有機會了解極地探險情况同當地人生活，因為港產極地探險家李樂詩捐咗啲探險工具、雪橇同埋相關展板畀間學校，校方就用嚟搞咗個「極地展覽館」，做環保教學基地，仲開放畀公眾參觀。「極地展覽館」裏面有個互動劇場，學生可以扮演因紐特人（Inuit，前稱愛斯基摩人），可以用第一身角度去了解北極文化、全球暖化嘅成因同影響。


李樂詩探險工具做教材

Emily聽聞，呢間學校都幾着重環保教育，校內仲有個「環保節能屋」同埋「環保藝術花園」，校方咁積極，最近「聯合國教科文組織中國可持續發展教育項目工作委員會」就將呢間學校封為「中國可持續發展教育項目實驗學校」之一，Emily希望其他學校都可以得到啟發，搞多啲豐富有趣嘅環保教育活動啦。