港大：中外訪客都如此

【明報專訊】噚日網上流傳一張「熱烈歡迎深圳市副市長吳以環訪問香港大學」嘅布景板圖片，聲稱喺港大醫學院拍攝，畀有啲網民批評字眼「大陸化」。


港大醫學院證實，噚日吳以環的確到訪，但就係以港大深圳醫院董事局主席身分訪問，主要討論醫院嘅事，仲話不論接待邊一方嘅訪客，都會整塊布景板或橫額歡迎。


話主要用嚟影團體相

醫學院話，今次吳以環隨行仲有兩位港大深圳醫院嘅內地董事，港大校長徐立之噚日都有出嚟接待。至於畀人話「內地化」，醫學院就話布景板主要係用嚟影團體相，外國來賓到訪就用英文歡迎詞，內地來賓就用中文，之後傳咗兩張早前用英文橫額歡迎哈佛教授、中文橫額歡迎深圳市長訪問團嘅資料圖片畀Emily，證明整呢啲布景板係平常事。