「數碼21諮詢」被轟做得差

【明報專訊】政府正就「2014數碼21資訊科技策略」諮詢公眾，相信除咗業界，好多市民未必知道，但其實呢個諮詢明日就會結束，互聯網專業協會會長洪為民就鬧爆呢個諮詢好差，指政府仲未明白IT對城市競爭力嘅重要，諮詢文件根本唔係針對大方向發展。


洪為民話香港IT滯後，比起發展得好好嘅愛沙尼亞，當地已經19年無用支票，就算政府同市民有錢銀往來，都喺網絡世界搞掂，相信如果香港做到，就唔使再發生1蚊退稅支票事件。


Flex-Logic創辦人執行董事楊全盛早前喺一個場合見到特首梁振英（CY），問對方成立科技局嘅進度，CY答佢話社會有共識，但有議員表明要政府用全民退保做交換，否則一定拉布，呢個結始終要時間解開。成立科技局唔易，但洪為民希望可以由政務司長成立跨部門小組，認真帶領IT界發展。