立法機關170周年 下月展覽重溫歷史

【明報專訊】相信唔少人都知「立法會」喺回歸前叫「立法局」，不過，原來香港立法機關唔係一成立就叫「立法局」。今年係香港立法機關成立170周年，立法會秘書處將舉辦「從立法局到立法會」活動，介紹立法會嘅演變。呢項活動下星期四（12月5日）開鑼，由立法會主席曾鈺成同埋內會正、副主席梁君彥、湯家驊主持啟動禮。


1875年時叫「定例局」

香港1843年已成立立法機關，早期無正式名稱，至1875年先至叫「定例局」，即係制訂法例嘅意思。之後再改名做「立法局」；回歸後變成今日嘅「立法會」。今年係立法機關成立170年，秘書處特別整咗個專題展覽，按時序顯示立法機關嘅組成、職能等演變過程，並展出立法會舊大樓會議廳前廳嘅銅鑼，以及前立法局主席座椅，展期至明年1月28日。秘書處仲安排特別教育導賞團，預約可致電3919 3399。