王冬勝披露 匯豐交行為爭客激烈討論

【明報專訊】噚日喺香港舉行的「中國併購年會」論壇，有唔少猛人出席，好似前銀監會主席劉明康，同埋前世銀副行長林毅夫，先後分析兼併成敗、大談中國經濟未來走向。


講者之一嘅匯豐亞太區副主席兼行政總裁王冬勝（Peter），大讚兩位演說太好，搞到唔敢照讀原本公關準備好嘅講辭，最後講番匯豐同交通銀行合作上嘅親身經歷。


Peter講番佢2005年加入匯豐，第一個任務就喺同交行打交道，最初雙方文化、商業上有很大的磨合空間。佢舉例話，當初匯豐在內地寄推廣信拓展業務，有時寄到交行現有客戶手上。交銀知道後質問Peter，點解一方面傾合作，另一方面又搶客，Peter直言雙方討論好激烈。Peter最後唯有帶交行高管到香港，親眼見識恒生銀行點樣同自己大股東匯豐激烈競爭、互相搶客。


內地營商秘訣：先解決上層領導

另外，Peter又透露在內地經商秘訣：最好先安排與最上層嘅領導見面，傾好合作大方向。因為內地文化之一是，只要最上級帶頭提出嘅，下面就一定會要做好，否則交不出功課就會「冇面」。


最後佢搞笑話，聽聞過併購失敗率高過荷李活名人嘅婚姻失敗率，強調併購前要了解雙方歷史、文化，不斷磨合，否則失敗收場。


email: piano@mingpao.com