夏千福立會開飯

【明報專訊】美國駐港總領事夏千福噚日又出動搵食，今次搵到去立法會。話說噚日立法會請咗20個新任總領事食晏交流，除咗夏千福，仲有北韓、沙特阿拉伯等總領事。餐飯食咗兩個鐘，夏千福之後行出嚟見到好多傳媒等候，不禁打咗個突，問大家點解連佢食餐飯都要等呢，結果講咗兩句客套說話，話食得好開心，又話多謝立法會主席宴請，但對所有政治提問一律封口，講咗唔夠1分鐘就走咗。


阿人唔怕人話勾結美帝

立法會主席曾鈺成飯後就話，夏千福身為外交官「又點會亂講嘢吖」。近日被建制派斥「賤骨頭」嘅工黨主席李卓人都有出席午宴，佢唔怕畀人話勾結美帝勢力咩？阿人話一啲都唔怕，事關噚日同佢同枱嘅係柬埔寨、新加坡等總領事，咁應該好安全啦。