馮煒光經驗「欠豐富」

【明報專訊】政府噚日公布新聞統籌專員人選，由「具有公關及政治工作」經驗嘅馮煒光跑出。馮煒光之前自比「白宮發言人」，有網民就即刻比較港美兩地「白宮發言人」人工，發現月薪18萬嘅港版「白宮發言人」，較月薪11萬嘅正牌白宮發言人，每月多7萬蚊咁多，難怪網民要加多一畫畀呢個「白宮發言人」，喺facebook噚日就開咗個「自宮發言人馮煒光」嘅page。


網民開「自宮發言人」page

噚日港府公布任命嘅新聞稿200幾字，發言人話「馮煒光具有公關及政治工作方面的經驗，當可勝任新聞統籌專員一職」。有眼明網民發現，今次嘅新聞稿同過往有啲唔同，例如發言人會形容前專員何安達同鄧惠鈞都係有「豐富」傳媒經驗，不過馮煒光嘅公關同政治工作就無咗「豐富」呢兩個字，箇中有冇玄機？真係各自解讀喇。