報佳音助青少年 歌王嶽有份

【明報專訊】唔少團體都會趁聖誕節上街唱聖詩報佳音，但如果報佳音同時又可以做善事，就更有意義。超過1.1萬名市民出錢出力，參加「聖誕頌歌節」活動，佢哋會喺即日起至12月25日去全港多個商場、主題公園唱聖誕歌，每人又至少捐200元，為兒童發展配對基金籌款。


「聖誕頌歌節」今年第四屆，過去3年籌得1200萬元，所得全數撥入兒童發展配對基金，基金目的係幫貧窮青少年訂進修目標，再訂立為期兩年嘅儲蓄目標，集資完成心願。儲蓄完成後，基金會一對一咁資助參加者，至今已有1200名青年受惠。


活動已截止報名，唔單止參加人數破紀錄，表演地點亦由舊年嘅70多個增至今年100多個，包括國金中心、置地廣場、海港城同海洋公園等。活動由即日開始，有超過200場嘅頌歌，參與者包括公務員、工商界同學界等，連「歌王」周一嶽都有份參加。錯過咗報名機會唔緊要，行過見到有團體頌歌時，記得停低細心欣賞，再諗諗下年係咪要預早報名！