宜家賣路姆西要派籌

【明報專訊】社民連成員上周六向特首梁振英掟「路姆西」（Lufsig）狼公仔之後，旋即引起搶購，噚日凌晨IKEA宜家家居官方網頁一度顯示路姆西「將會下架」，不會補貨，被網民話政治審查，結果大批人往入貨。噚日IKEA全線3間分店嘅路姆西已售罄，今日銅鑼灣同沙田會有小量補貨，若再賣晒就要等到下年1月返貨。


宜家否認下架消息

IKEA發言人話，從未在香港宜家家居官方網頁發放有關Lufsig下架嘅消息。但Emily噚日凌晨真係喺官網截咗圖，不過朝早個網已經話有貨，究竟發生咩事？IKEA噚晚話暫無補充。


有人話買200隻

其實噚日開舖無耐路姆西已賣晒，IKEA下午4點零鐘返貨，3點幾已大排長龍，唔使15分鐘又賣晒，網上話有人一口氣買200隻。結果銅鑼灣店傍晚要派過百個籌，限每人買1隻。


每賣一隻 捐10元助兒童

路姆西搶手，DJ森美同公民黨陳淑莊都有，網上亦現炒風，一隻盛惠$689，有人轉戰淘寶網或去IKEA各地網站掃貨。理大社會政策研究中心主任鍾劍華話，呢個現象反映社會上部分人對政府好不滿，只要小小事令政府尷尬，都會去做。


其實，IKEA每賣一隻毛公仔，就捐10蚊畀聯合國兒童基金會及救助兒童會嘅兒童助學計劃，但其他毛公仔，好似一隻叫「沃文」嘅狗公仔，就無乜人問津。