王國興促驗公廁灰廁紙

【明報專訊】唔少議員都本住民生無小事心態做嘢，好似工聯會王國興噚日就喺立法會上提出質詢，將港九新界公廁同政府總部嘅廁紙擺喺枱面，要求食物及衛生局長高永文拎返去化驗再交報告。拎齊咁多公廁廁紙唔易，有人質疑佢係咪偷番嚟，但王國興強調佢係借唔係偷，又話即使還咗，人哋都未必會拎番出嚟用，所以唔打算還。


王國興將廁紙一字排開，連立法會主席曾鈺成都質疑，問佢係咪將含菌量超標嘅廁紙樣本陳列，仲提醒佢為議員安全，希望大家避免將受污染物品陳列。王國興一於少理，話點解「同人唔同命」，地區公廁嘅就灰灰哋色，政總嘅就鮮白色。自由黨田北俊質疑，白色廁紙係貴啲，定係因其他公廁環境影響而變灰。


高永文：顏色質量無關係

高永文就話，從醫學角度，佢唔認為廁紙顏色同質量有咩關係，又話最重要係注意個人衛生、要洗手，否則一唔小心就可能會接觸到污穢排泄物。王國興仍唔收貨，話如果政總都用埋灰色嘅廁紙，佢就服喇。高永文話其實各人對廁紙質量喜好唔同，「有人鍾意吸水力強，有人鍾意軟啲、硬啲」。