中鋁高層 減薪過寒冬

【明報專訊】舊年登上「A股蝕錢王」第二位嘅央企中國鋁業（2600），今年大規模拋售資產，艱難爬山，過咗三季仲未「止血」，眼睇全年再錄得虧損，就要被上交所貼上「ST」（Special Treatment，代表有退市風險）代號。噚日有內地媒體爆中鋁內部人士話，國資委要求中鋁下「止血軍令狀」，高管工資要打五折，部分核心高管仲「零薪酬」。員工仲慘，要靠兼職「開黑車」、「洗碗」養家。


消息話高層壓力好大，要加速推進關鍵項目；而個關鍵項目就係一個喺秘魯嘅銅礦，但外界都質疑前景，因為當地礦區居民嘅搬遷成本好高。


其實管理層降薪「過冬」都唔算第一次，2008年就有過，但呢頭蝕錢，嗰頭上個月仲爆出前副總公款買茅台、五糧液。如果話外部環境唔好，但中鋁虧損呢幾年，有民營鋁企舊年賺咗54億人仔。睇來中鋁想擺脫「勁蝕王」，要同民企好好學習下啦。


[小琴密語]