黃定光雖「揀定」 周浩鼎接進出口界議席有阻力

【明報專訊】距離2016立法會選舉仲有約兩年半，不過有意參選者都已積極工作，政黨亦針對有潛質黨員重點培訓，其實商會亦開始準備換班，當中更牽涉商會換領導層問題。其中進出口界立法會議員黃定光（象哥）早前表明下屆未必再選，仲寄語徒弟、青年民建聯主席周浩鼎爭取業界支持，早前仲喺周浩鼎婚禮上，話對方日後進入立法會就要不停工作咁，被人認為佢已揀定周浩鼎接班。


中出嫌非商界出身

不過，Emily聽聞象哥呢個如意算盤未必咁易打得響，因為中華出入口商會內似乎對由周浩鼎接任亦有質疑，覺得對方地區工作雖然好努力，但始終唔係商界出身，未必能代表個會講嘢，加上會內不乏有商界背景嘅年輕一代，要接班似乎未排到周浩鼎喎。不過，有「中出」成員笑言，象哥最終不言退嘅機會亦唔細。


李秀恆有機任會長

另一邊廂，中出及廠商會明年底亦夠鐘換屆，兩個會嘅會長莊成鑫同施榮懷都唔會再連任，由於下次任期橫跨2016年立法會選舉，相信會長亦對立會人選有一定影響。咁兩個會有咩接班人呢？Emily分別從中出、廠商會中人口中聽聞，李秀恆都有機會接任會長，原來李秀恆喺呢兩個會都分別擔任副會長，有一定資歷，過去一段時間都為更上一層樓鋪路，但究竟李秀恆點揀，相信當事人自己先知。