港龍頭等艙upgrade

【明報專訊】年初港龍為所有商務艙和經濟艙座椅升級，家航空業有番少少起色，兩艙表現反彈，港龍當然不會怠慢。尋日天氣咁凍，Emily參觀咗港龍即將推出嘅全新頭等客艙，同埋為冬日準備嘅野菌系列煲仔飯，望落又幾暖笠笠。


睡牀加長14吋

新嘅頭等客艙採用國泰長途機商務艙嘅座椅，從原先微傾斜牀改成可以全平臥嘅睡牀，新睡牀長約82吋，比原先長14吋。電視屏幕由10.4吋變成15.4吋，仲新增USB同iPhone等端口，咁就唔需要只係睇港龍揀嘅節目啦。港龍話新座椅從出年第一季開始換，第三季全部A330客機都會換上。除咗升級座椅班富貴客開心，港龍話短途機好多常客，如果食物轉得慢，春夏秋冬都淨得冬瓜盅，就最容易被投訴。今年冬天煲仔飯仍是主打，食材以野菌為主。兩艙餐單都幾吸引，例如金銀蒜蟲草花羊肚菌虎蝦腩片煲仔飯、黑松露鵝肝雞油菌牛柳粒煲仔飯。


另外，港龍出年亦準備咗一批新嘅機上銷售產品，仍以護膚品、電子產品同酒類為主。現時港龍嘅免費府上送貨服務覆蓋香港、內地、台灣、新加坡同韓國。