維港除夕煙花燒8分鐘

【明報專訊】今年維港除夕倒數活動花費1300萬元，除咗有煙火，更首次加入煙花，規模歷年最大，預計吸引40萬人喺維港兩岸觀賞。


主辦活動嘅旅發局話，今年除夕夜11點開始，港島7幢建築物每隔15分鐘發放煙火，營造許願流星嘅效果，會展旁嘅巨型LED屏幕顯示新年祝福語。踏入零時零分，維港上空有歷時8分鐘嘅「煙火音樂匯演」，海面與陸上同步發放煙花及煙火，造出心形或笑臉等圖案；灣仔會展嘅大屏幕，就會打出「2014」字樣。


匯演寬度增至千米

去年國慶煙花發生海難慘劇，為確保海上安全，旅發局主席林建岳話，政府做咗唔少工夫，維港中部會於當晚11時臨時封閉，九龍公眾碼頭暫停使用，海事處加派人手巡查，通知海上遊覽船營運商注意安全，水警亦會協助海事處維持海上公眾秩序。


今年除夕倒數匯演規模歷年最大，陸上煙火發放點由不足10個增至20個，海上3艘躉船負責放煙花，匯演闊度由去年嘅500米增至逾1000米。旅發局建議，最佳觀賞地點係尖沙嘴星光大道及文化中心一帶，以及中環新海濱至灣仔金紫荊廣場。


煙花威力大過煙火

根據政府以往嘅解釋，煙花同煙火配備嘅物料唔同，煙火威力較低，一般燃放後會喺空中消散，煙花則會喺空中再爆開，拼成圖案。