Google搜尋榜 雙颱風熱爆

【明報專訊】2013年嘅香港喺風雨中度過，Google公布2013年搜尋排行榜，颱風「天兔」同「尤特」襲港，榮登十大迅速熱爆社會話題榜第1同第7位。


颱風襲港全城癱瘓，打工仔除咗關心有無假放，亦有唔少人對天兔風力「失望」，所以特別多人搜尋颱風資料，了解天氣到後來唔係預期嘅原因，就連電視發牌事件同H7N9禽流感亦只屈居第2及第3位。


手機遊戲成最熱關鍵字

排第2嘅電視發牌事件，除咗觸發港人熄電視，更令王維基成為Google 2013十大迅速爆紅人物嘅第4位。為港人帶嚟歡樂、人氣爆燈嘅黃色巨鴨，成為熱爆社會話題嘅第4位，亦係榜上罕有唔係負面嘅新聞。


Google分析，今年排行榜顯示港人高度關注本地民生及政治話題，例如電視發牌、H7N9禽流感、佔領中環等都有上榜。人物方面，除咗斯諾登同王維基分別打入十大迅速爆紅人物榜嘅3、4位，其他上榜嘅都係女姓，包括榜首嘅因車禍意外身亡嘅歌手陳僖儀。至於2013年十大迅速爆紅關鍵字，手機遊戲Puzzle & Dragons及Chain Chronicle上榜，反映呢兩款遊戲喺香港掀起熱潮。