梁繼昌不丹尋幸福 陳恒鑌留港派套套

【明報專訊】聽日聖誕，立法會將喺1月8日先復會，行政會議亦休息兩星期。新民黨主席葉劉淑儀已經同阿女Cynthia上機去意大利旅行，葉太話，想去感受吓寧靜嘅宗教氣氛。如果大家好記性，可能記得葉太無幾耐前先同愛女去過意大利南部，葉太話，其實佢成世人都未去過羅馬、梵蒂岡及佛羅倫斯呢幾個地方，咁啱又想過一個無咁商業化嘅聖誕，所以一於再去意大利！


葉劉又去意大利

同係議員，民建聯陳恒鑌（Ben）就另有「任務」，今日要為新界青年聯會喺旺角派安全套，阿Ben話聯會原本每年聖誕前夕都會派安全套，但去年因為搵唔到贊助，所以中斷，今年搵到由何潤東代言嘅安全套品牌贊助，就可「復派」嘞。阿Ben透露，派套時會播放軟硬天師舊歌《點解要大家笠》，呼籲市民支持安全性行為，大家想捧場嘅話，記住今日4點去旺角行人專用區。


會計界梁繼昌透露，今個聖誕會帶埋家人去不丹行山，話要去「尋找幸福」，佢話雖然仔女鍾意主題公園，但亦好喜歡大自然風景。公民黨郭榮鏗就會一家去加拿大探親10日，順便休息，但嗰邊家冰天雪地，佢哋真係要做足保暖措施先得。


謝偉俊留港「深切檢討」

聖誕節議員節目多姿多采，但謝偉俊講笑，話過去一段時間圍繞佢好多風波，所以要留港靜思「深切檢討」咁話。