青民盼吸千名新血

【明報專訊】青年民建聯嚟緊10周年，青民總監張國鈞話，民建聯計劃明年喺青年、工商、專業3個委員會積極吸納新血，3個委員會最少可以吸到1000名新人。對於立法會主席曾鈺成早前話香港政治人才唔夠，民建聯副秘書長葉傲冬就話，以往的確比較少有呢3個板塊嘅人願意主動加入政黨，希望今次可以令呢3類黨員人數顯著上升，亦能回應社會發展。


集中青年 專業 工商搵人

青民主席周浩鼎（Holden）、張國鈞、葉傲冬等噚日同傳媒茶敘。張國鈞話通常想加入政黨嘅專業人士有3種，第一種人係想參選；第二種人係生活安穩、想貢獻社會，所以鍾意跟政黨落區提供義務專業服務；最後一種就係喺不同社會政策有專長，希望透過政黨表達意見。


為打響頭炮，佢哋1月1日會喺添馬公園搞啟動活動，動員18區支部青年、工商、專業會員、議員幹事等出席。副主席李慧琼、張國鈞全家人就會試穿全新義工背心行天橋。葉傲冬話，民建聯有地區網絡，同政府關係好，覺得兩樣都係優勢，可以吸引專業人士，都希望可以做到橋樑，加強培訓。民建聯曾創下年內黨員翻一番嘅壯舉，睇嚟其他政黨真係要認真「接招」。