郭炳江最「拿手」煮公仔面

【明報專訊】新地聯席主席兼董事總經理郭炳江（Thomas）向來都好熱心支持慈善，噚日佢出席旗下馬灣挪亞方舟慈善活動嘅揭幕禮，喺活動大使關詠荷（荷姐）嘅指導下煮咗個洋葱雞肉蛋飯畀幾位來自基層嘅小朋友食。荷姐仲爆料話，原來Thomas一向識下廚，拍拖時仲曾親手煮東菇雞飯畀女朋友吃。


關詠荷同場教煮飯

小琴噚日見到Thomas揸起鑊鏟都算有板有眼，除咗東菇雞飯之外，佢最常煮嘅就喺公仔麵。據Thomas講自己經常做到好夜先返屋企，肚餓時就會自己淥公仔麵食，通常仲會打開雪櫃望下有咩隔夜餸，撈埋一齊煮熱就咁一餐，Thomas仲強調係好好食㗎。


Thomas噚日分享自己細個都讀基層嘅慈幼小學，一樣要搭電車、巴士返學，又認識唔少住公屋嘅基層朋友仔，可謂好明白基層嘅苦處，所以現時盡力幫助。


佢又講，原來小時候耳仔有毛病，聽力唔太好所以讀書成績麻麻，最終小二時就要去日本做手術花成9個月時間治療，過程中都好辛苦。


email: piano@mingpao.com

[小琴密語]