李慧詩正能量爆燈

【明報專訊】2013年快將過去，過去一年社會唔少紛爭，有林老師爆粗事件，又有電視發牌，真係需要一啲正能量先得。過去一年，大家覺得最開心嘅新聞係咩呢？香港電台第一台節目《開心日報》前排搞咗個「十大開心新聞選舉」，畀市民喺30則新聞中，選出最令大家開心嘅10宗新聞，結果「牛下女車神」李慧詩再創歷史成為「開心新聞首位」。


其餘開心新聞仲有黃色巨鴨游維港、唇讀少女曾芷君文憑試奪佳績圓大學夢、港產聖誕老人揚威丹麥、8月香港出現雙彩虹、《狂舞派》獲金馬獎提名，以及港隊喺特殊奧運會獎牌大豐收。


巨鴨唇讀少女榜上有名

連英國王室添丁、藝人陳豪同陳茵媺結婚都躋身十大開心新聞。相反，港府政策例如推出廣東計劃呢啲比較悶嘅新聞就榜上無名。


至於係點解，香港研究協會噚日公布嘅調查或可見端倪。


協會喺本月12日至20日訪問1069名18歲或以上市民，63%受訪者話今年過得開心，較去年升11%，不過有69%受訪者表示對香港民生狀况同政治環境不滿，分別較去年上升4及2個百分點，滿意度各跌2個百分點，跌到14%同10%水平。


六成市民不滿民生政治

此外，仲有53%受訪者表示對來年樓市悲觀，研究人員促請政府同立法會議員要積極改善市民生活質素咁話。