煙花「許願流星」迎2014

【明報專訊】2013最後一日，市區氣溫最低得11℃，除夕夜雖然凍到人騰騰震，都唔一定要hea喺屋企，出街趁吓熱鬧，人都冇咁凍㗎，Emily就為大家蒐集咗一系列活動。


7廈每15分鐘發放「流星」

最受歡迎又一定最多人嘅就梗係維港兩岸嘅倒數活動，今晚11點鐘起，7幢港島地標包括合和中心、中環廣場等，會每隔15分鐘一齊發放唔同顏色，分別代表事業、健康、財富同愛情嘅「許願流星」，大家記得把握機會許願。


去到11點59分50秒嘅一刻，灣仔會展隔籬嘅巨型LED熒幕就會進入10秒倒數，踏入2014年，維港上空同兩岸大廈就會有歷時8分鐘嘅「煙火音樂匯演」，氣氛一定冇得彈。


時代有大大粒Candy Crush

而講倒數，當然唔少得時代廣場，今年大會就安排咗全球最大嘅Candy Crush糖果，響LED巨型幕牆登場陪市民倒數，又真係幾divine喎！

中西區長廊有明星抽獎

中西區海濱長廊亦搞咗個「愛在中西區勁歌熱舞除夕繽紛夜」，請咗羅敏莊等明星表演，仲有抽獎遊戲。新界區都唔執輸，沙田公園、沙田大會堂廣場同城市藝坊就搞咗個「2013除夕倒數嘉年華」（見表）。


預祝大家新年平安快樂，記住今晚著多件衫呀！