醫局猛人舊照尋

【明報專訊】醫院管理局官方刊物《協力》今期封面大相係新鮮出爐嘅醫管局主席梁智仁教授，但Emily嘅眼球被內頁一張泛黃嘅相片吸引。張相係1990年首屆醫管局委員嘅大合照，要喺成堆人裏面認出後生版嘅梁智仁唔易；至於相中其他委員，就全部都已經卸任。


呢張舊相裏面，坐喺中間交叉腳嗰位男士，就係首屆醫管局主席鍾士元爵士（外號大Sir），Emily聽啲醫生講，全靠大Sir呢位政壇一哥支持醫管局先至辦得成。


企係最左邊嗰位係前教育局長李國章，左三就係醫管局前主席梁智鴻，佢喺SARS後辭職，呢張相就見證咗佢同細佬梁智仁一齊做過醫管局委員。前衛生福利及食物局長楊永強都喺相中，當時佢係醫管局嘅管理層。