成名搞「民主教室」 李偲嫣取經話失望

【明報專訊】科大社會科學學部副教授成名同浸大政治及國際關係學系助理教授黃偉國，近日成立咗一個叫「民主教室」嘅網絡平台。佢哋噚日搞咗一個政改論壇作為頭炮活動，吸引到「正義聯盟」召集人李偲嫣去取經，不過李偲嫣就話論壇同網絡平台嘅內容都幾偏頗，唔排除自己搞番個。


網上放教材 講政改立會

成名話嚿年暑假尾開始着手搞「民主教室」，家已經上載咗大部分研究同教材，當中除咗講政改，也有仔細介紹功能組別存廢議題。噚日「民主教室」就請咗8名政界人士同學者討論功能組別存廢問題，李偲嫣就同幾個「正義聯盟」成員去觀摩，有個「正義聯盟」成員仲向主持人黃偉國「挑機」，話佢作為主持唔夠中立，對功能組別存廢抱立場，黃偉國就懶得回應。


李：內容偏頗 唔排除自己搞

李偲嫣就話對個論壇幾失望，因為以為個論壇喺講政改，點知喺講功能組別存廢。佢又話泛民同建制講者嘅比例唔夠平衡，8名講者中得兩名建制代表，分別喺立法會議員謝偉俊同自由黨青年團主席李梓敬。李偲嫣話計劃喺農曆新年前搞個類似論壇，不過「聲音一定會平衡啲」。佢仲話未來有一個對抗佔中嘅「驚喜行動」，叫大家留意。