避辣招反常態 Ann姐用自己名買樓

【明報專訊】民建聯副主席蔣麗芸（Ann姐）榮升業主！？Ann姐當然係有樓之人，但佢近年一向喺用公司名義買樓，但因為政府推出辣招買家印花稅（BSD），用公司名義買樓要畀多15％稅款三四百萬，所以佢今次買樓，都用番自己嘅名去做交易。


2000多萬西九盤 慳三四百萬

Ann姐早前已透露，想喺西九龍買樓，原來佢9月已喺九龍站漾日居用2000多萬元購入咗一個面積約1100多平方呎單位。點解咁大手筆？Ann姐話，都係為咗立法會嘅工作，因為想方便見地區人士同做地區工作，加上九龍站又近立法會，Ann姐話，揸車返立法會都唔使10分鐘喎！


話買新樓 因方便做地區工作

Ann姐透露，以前佢買樓，通常都係用公司名義買，所以今次可以話佢自從推出辣招後，首次以個人名義做業主。


佢話會趁農曆新年前搬入新居，康樂園舊居就會繼續自用，唔會出租，不過Ann姐話，農曆新年都未必會成日留喺屋企喎。


點解？佢話本來買晒機票今個月底去越南硯港玩幾日，但因為各政策局長喺月底會去立法會，簡報施政報告工作，Ann姐話佢應盡議員責任留喺度開會，唯有犧牲吓改日程，所以佢推遲農曆新年後先搭郵輪，同老公梁海明去吹下海風唞幾日。