林卓廷搞講座 免費教考廉署

【明報專訊】民主黨總幹事林卓廷之前做過廉政主任，早排前廉政專員湯顯明事件，佢不時以專家口吻評論。林卓廷最近有新搞作，今個月18號搞一場投考廉署免費講座，講明教應試技巧及突圍必殺技。不過，林卓廷話，佢想藉呢次講座，勸勉投考者唔好只係為3.6萬元薪酬報考，話做廉署最重要有使命感，千祈唔好學湯顯明咁識飲識食。


林卓廷話，坊間有收錢課程教人報考紀律部隊，但佢就不但免費，仲以過來人第一身教路，應該有說服力。佢話，每年有幾千人爭廉署職位，應試表現十分重要，又話面試最難係應徵者抽出一個英文字牌，然後自由發揮，用呢個英文字講5分鐘英文演說。佢話，呢關好多英文好嘅大學生都被考起，因為不止考英文，更要考應變能力。


佢話，暫定先搞一場講座，名額50，如果反應好，隨時可以加場。睇嚟政黨除咗派蛇齋餅糉、幫人磨菜刀，求職講座都係吸引巿民嘅好方法。