古今建築模型今起有得睇

【明報專訊】香港從古到今嘅建築設計珍貴資料，市民家有機會溫故知新。由西九M+博物館策劃、名為「構．建Ｍ+：博物館設計方案及建築藏品」嘅建築展，今日起至2月9號喺港島東太古坊康和大廈舉行，除咗揭示預定2017年底建成嘅M+博物館建築模型初稿（1比100），仲呈現香港1960年代起嘅建築歷史，包括山頂凌霄閣前身、已拆卸嘅「老襯亭」觀景台模型，九龍城寨嘅鳥瞰圖同錄像，仲有美孚新邨、港安醫院同科大嘅建築手繪圖則等。


M+博物館1比100模型

西九管理局M+行政總監李立偉話，M+建築設計嘅最終調整預料2月中完成，強調家仍維持50億元預算建築成本內，料M+最快8月開始動土。佢特別提到，由於香港無儲存地方，過往包括老襯亭在內嘅本港建築設計模型都會拆毁，因應展覽去年先將之恢復原狀，希望M+日後可作收集建築藏品場地。


展覽展出過去10個月來Ｍ+蒐購其中逾百件建築藏品，包括模型、圖則、相片同影像紀錄等資料，來自本港及內地等共35名建築師或藝術家，海外部分就有1920年代日本帝國酒店手繪圖則，同內地艾未未係北京嘅工作室模型，展覽開放時間朝十晚八，免費入場。