幫港出聲盼籌500萬

【明報專訊】去年8月8號成立嘅反佔中團體「幫港出聲」，噚日宣布以後會「兩條腿」走路，一邊反佔中、另一邊提供平台講政改，所以未來會有一連串籌款活動，例如高爾夫球比賽，應付日後開支。召集人馮家彬話目標籌500萬，仲拍心口話「好有信心」。


「幫港出聲」成立初期表明唔會論政，但馮家彬噚日喺記者會度話，政改諮詢展開，所以幫港出聲嘅工作會進入新階段，除咗反佔中，仲會以「和平合法，促成普選」為口號，鼓勵大家參與政改討論。


馮家彬仲透露幫港出聲成立初期全靠一眾核心成員捐款，先可以籌到200多萬。不過，佢哋賣咗4次報章廣告，已經使咗百幾萬。所以為咗應付開支，未來會搞電影首映禮、高球賽同名人飯局，目標係籌500萬。