工作坊教細路拜年惹質疑

【明報專訊】香港家陣樣樣嘢都可以有培訓班，唔止朗誦要有特別技巧，坊間仲有專門培訓口才嘅機構推出「好口才工作坊」，專攻拜年唔識禮儀同無自信表達自己嘅小朋友市場，一天特訓班收280元。唔知上完堂之後額外番嚟嘅利市，能否幫補課程費用呢？


「拜年都有人教，使咩有家教？」

「磨菇媽媽育兒手冊」喺facebook質疑「拜年都有人教，使咩有家教？」，惹來唔少人討論，其後佢仲將搞培訓班嘅公司聯絡方法於網上公開，Emily於是打去呢間「李麗斯演說培訓」公司查問工作坊細節，但電話打極都無人聽，電郵查詢亦無人回覆。


該課程網上流傳嘅單張以「想讓小朋友拜年更進步？」為題，話課程會教小朋友恭賀詞句、拜年基本禮儀、智慧理財觀念同埋溝通表達技巧，話題覆蓋之闊令Emily嘆為觀止。工作坊分幼稚園同小學兩班，1日、2日及3日課程分別收費280元、420元及500元。


睇番呢間公司嘅官網，創辦人李麗斯「熱愛語言教育，曾於國內接受教育」，喺樹仁大學新聞及傳播學系畢業，曾贏得大學演講比賽冠軍，仲話幫過中聯辦宣傳文體部長郝鐵川主持網上節目。