1人示威 叫解放軍撤港

【明報專訊】自從中環海濱區嘅軍用碼頭變成新聞熱話後，一向低調嘅駐港解放軍開始惹起市民關注，繼早前有人涉闖入添馬艦解放軍總部後，噚日又有市民發起去添馬艦交請願信要求撤軍，聲稱會有數人出席，最後只得一人現身，但呢位仁兄就話對人數「不感失望」。


示威者：搞吓新意

單挑解放軍嘅劉先生唔願意透露自己身分同背景，佢話見到香港環境日漸變差，細路仔要搶學位，出街搭地鐵又要等多幾班車，又覺得一般示威遊行好似無效，所以想搞吓新意。雖然one man band，但佢話最重要表達到聲音，無人陪都無所謂。


不過，噚日示威嘅位置離軍營入口差咗成條街，佢都覺得無乜效，但因為自己「非暴力」，所以唔會硬闖入去。解放軍最後就無派人收信，佢要走到政府總部將信交畀保安局代轉交。