廉署提中醫：假紙望聞問切

【明報專訊】「望聞問切」係醫生嘅診症術語，原來用喺反貪都啱用，廉政公署最近整咗本《中醫師與中醫診所防貪指引》，會派畀全港近萬個註冊中醫師，提醒佢哋簽假紙時要留意嘅嘢，包括資料一定要真、字體要工整清晰、唔好簽兩張單，同埋同一收據上要分開寫上診金同藥費，以免被人濫用。


廉署防貪處首席防貪主任（署理）王國雄話，唔少中醫師係私人執業，或喺中藥行「掛單」會診，無論係病人預約、診症或採購等都無清晰程序及指引，又無電腦化紀錄，好難管理。


香港註冊中醫學會會長陳永光話，學會近6000名醫師會員都接受指引，廉署亦會搞講座講解。至於中醫師「掛單」喺藥行會診，轉介病人畀同一間藥行「執藥」會引起嫌疑，陳直言病人有權選擇喺其他藥行選購藥材，暫時無收過類似投訴。