立會保安搞錯譚耀宗劉江華

【明報專訊】幾個學民思潮成員上個禮拜六喺政制事務委員會公聽會尾聲時，離開座位突圍，向政制及內地事務局副局長劉江華遞請願信，結果被委員會主席譚耀宗指行為極不檢點，遭逐出會議室，仲畀保安帶咗去一間房登記，搞咗一大輪。但學民仔發現咗一個「驚人秘密」，原來命令佢哋離開嘅，係「會議主席劉江華」！Emily嚇咗一跳，原來只係立法會保安調亂咗譚耀宗同劉江華，唔通立法會嘅保安都好掛住劉副局長？


學民思潮黎汶洛話，當日被保安帶入房後，保安要求佢哋交出身分證做登記同寫低被逐原因，仲一度要求佢哋簽警告書，承諾以後唔會再犯，而保安忙亂間，就將委員會主席譚耀宗寫錯咗做「劉江華」。


公聽會學民被逐帶入房

最後搞咗約一個鐘，學民仔最終唔使簽警告書，但表格涉及私隱，黎汶洛要拎番張form，最終發現被逐「真相」。其實睇嚟睇去，譚耀宗同劉江華不論長相、身材無一相似，唔通係民建聯黨性相近，令人偶爾會認錯？