清朝郵封 108萬成交

【明報專訊】斯賓克拍賣行（Spink）喺過去周末舉行一連兩日拍賣會，推出近2000款歷史悠久嘅郵政珍品、錢幣、債券同股票。其中一個遠至1884年嘅郵封（右上圖），最終有買家以108萬元高價投得。Emily聽講個郵封係清朝時期，要由江西省九江市先寄去上海、香港，超過一個月至寄到德國，由於過程轉折，所以印咗6個唔同地方嘅郵戳，封面貼上兩個香港藍色5仙郵票，背面蓋有中國褐紅色大龍叁分銀票。


九江寄出 經滬港到德國

聽專家講，郵封底大龍銀票上嘅6月17日紅色九江日戳，係現時已知全球僅3個蓋有呢日郵戳嘅郵封之一，相當珍罕。此外，一張1882年香港上海滙理銀行嘅100元樣票（右下圖），成交價69.6萬，比原先估價高3倍；拍賣會多次見到嘅1980年「金猴」80枚全張版票，就以高價120萬成交。